|
A San Martin él gnü daurí la mostra dl Fotoclub Val Badia dal tema "blanch y fosch". Ara restará daverta cina ai 25 de novëmber. Al é ince gnü premié i davagnadus dl concurs. I pröms trëi posć é de Karin Pizzinini, Helmut Elzenbaumer y Samuel Debon.
Fotografia - Al é bele tradiziun che le Fotoclub Val Badia organisëia na mostra da d'altonn tla sënta dl Istitut Ladin Micurá de Rü, olache an pó odëi les posiziuns tl ciamp dla fotografia di apascioná de nosta val y foradecá.
La mostra podesson confronté cun n atlas, deache al é fotografies da plü posć dla valada y foradecá, y les tematiches vá dal macro ala natöra, al'architetöra, dal panorama cina ai iadi. Vigni fotograf chir na tecnica particolara da fá jö, l'analogh é tl morí fora y les fotos dl concurs vëgn sëgn presentades ma plü tla forma digitala. Ales fotos, sciöche ince chёres dl concurs 2016, pón sёgn ti ciaré a ciasa sön la homepage dl Fotoclub www.fotoclubvalbadia.it.
Al ne basta nia avëi n bun aparat da fá jö; al ó ester n bun edl por che al garetes na foto. Mo ci che liëia adöm düc i fotografs, é la pasciun por chirí la foto ideala. Y spo, sce ara vá inant insciö, messarán nia aspeté dî cina che al sará n fotograf che davagna cun na foto fata cun le smartphone, dailó gnarál scrit n ater capitul pro le Fotoclub.
La mostra a San Martin de Tor
Tröc fotografs se presentëia vigni ann te chësta mostra y al é bel da odëi le svilup che vigni singul fej, ci idees che al porta ite y a ci che al ti dá pёis. A ci ti dái pa espresciun y ci é pa l'estetica por me? Chёsta é sigü öna dles domandes che an pó se fá. I fotografs ó mostré süa realté, süa verité, y cun chësta filosofia prói da svilupé inant sües idees. Y sce an ti ciara ales fotografies, vëigon che vignun ó mostré y interpreté so monn y ci che al sint.
I fotografs á porvé da cunté so monn cun fotos dalunc, dai stereotips che an vëiga bele tl web y tla televijiun, y chësc desceda te nos na coriosité nia da püch. Cun l'obietif ói dantadöt cunté la vita, la cossa plü bela, y la conzentraziun por pié chësc momënt é tres grana. I fotografs ti ciara cun sensibilité a ci che al sozed incër ëi ia, ci sëgns che le monn ti dá y ai mudamënc tl ambiënt che an pó odëi. Chësc ann él gnü chirí fora le tema "blanch y fosch". La fotografia a blanch y fosch adora i fotografs dёr ion y ai resta dёr afasciná dai resultac che chёsta tecnica pîta. I fotografs pó se conzentré sön la composiziun y ci che ai ó dí cun chёsta fotografia. Sambёgn ti vёgnel dé pёis ala löm, ales ambries, ai contrasć, ales formes y strotöres tla fotografia, n monn che é interessant por tröc apascioná.
Pro le Fotoclub él fotografs dla natöra che á arjunt n livel dёr alt y an conёsc che ai laora cun gran pasciun. Pro chёsc concurs messâ ince ёi lauré ma a blanch y fosch, se tó tёmp y aspeté le dёr momёnt. Ai nes mostra les formes dla natöra che é da odёi, mo che nos cun nosta prescia n'odun nia. Chiló nascel spo ci che le fotograf pó ma speré da trasmёte: emoziuns.
Premiaziun dl concurs
La juria metüda adöm da Ivan Castlunger, Alfons Elzenbaumer, Norbert Scantamburlo (presidёnt dl Fotoclub da Bornech) y Sepp Hackhofer (ex-presidёnt dl Strix), á messü chirí fora danter 88 fotografies a blanch y fosch y 30 é spo gnüdes chirides fora por la mostra.
Al é sté 18 fotografs che á tut pert y 10 é gnüs premiá pro la daurida dla mostra, mo a düc ti vál n gran complimёnt: ai s'á dёr porvé!
Le pröm post pro le concurs á arjunt Karin Pizzinini, na fotografa che s'á bele fat aprijé pro ediziuns passades y che é ince conosciüda tla Val Badia y foradecá. Pro süa fotografia él da odёi les tonalités carateristiches por la fotografia a blanch y fosch; la reduziun é tl zёnter de so laur. La lominosité, la löm, l'ambria y i contrasć é laurá fora dёr bun; cun chёstes püces cosses é Karin buna da arjunje na gran espressivité. La tecnica dla fotografa é dёr alta, an vёiga che ara sá a ci che ara ó ti dé importanza.
Le secundo post ti é jü a Helmut Elzenbaumer. An vёiga dёr bun i contrasć y la strotöra tla natöra che fej fora le livel dёr alt de chёsc laur. Nia saurí lauré cun chёsta tecnica: le fotograf mёss ponsé atramёnter co canche al laora cun le corú. Tla fotografia vëigon la contrada ladina ciamó sciöche nüsc antenac la viô, zёnza l'influs dl turism y strades che röia indlunch.
L'amur por i compagns a cater iames ti á fat arjunje a Samuel Debon le terzo post pro le concurs. Le fotograf jonn da La Ila é sté bun da pié le dёr momёnt, olache an se damana ci che al sozederá ti proscims menüc; i edli dl iat tira nosta atenziun y al nasc na coriosité te nos. Ince le livel dla tecnica tla fotografia é dёr alt; al á desmostré che al sá da lauré dёr bun cun la löm.
Da segnalé él ciamó i fotografs che é rová ti pröms diesc, chiló él da nominé al 4. post Paul Erlacher, al 5. post Helmut Elzenbaumer, al 6. post Veronica Moling, al 7. post Alfred Erardi, al 8. post Helmut Elzenbaumer, al 9. post Werner Dejori y al 10. post Ulrike Ploner.
La vernissaja dla mostra é stada ai 12 de novëmber. Te chёsta ocajiun á Alfred Erardi podü saludé i apascioná dla Val Badia y foradecá, y te chёsta ocajiun él gnü mostré dötes les fotos menades ite te na forma digitala.
Passé y dagní dl fotoclub
Sce an ciara zoruch al'ativité dl Fotoclub Val Badia, pón bёgn dí che al á ciafé süa lerch tl panorama dla culura ladina; l'interes por chёsta uniun crёsc vigni ann, la homepage y la plata facebook vёgn dёr vijitades. Sce i ti ciarun sёgn al Fotoclub, pón bёgn dí che al é sté n'evoluziun positiva te chisc ultims agn.
Al paia sigü la mëia da se tó le tëmp da jí a ti ciaré ala mostra tl Istitut y odёi olache vigni fotograf á ciafé le post de morvëia por sües fotografies. La mostra restará daverta cina ai 25 de novëmer, ti orars de daurida dl Istitut Ladin.
Rudi Moling, por le Fotoclub Val Badia
|
|
|
1° post Karin Pizzinini
|
2° post Helmut Elzenbaumer
|
3° post Samuel Debon
|
|
|
|
|
4° post Paul Erlacher
|
5° post Helmut Elzenbaumer
|
6° post Veronica Moling
|
7° post Alfred Erardi
|
|
|
|
8° post Helmut Elzenbaumer
|
9° post Werner Dejori
|
10° post Ulrike Ploner
|
Dessot pon ciafè la galeria dles 30 fotos plü beles dl concurs 2016. Les fotos dô le 10° post é gnüdes metüdes ite a cajo, nia dô la tlassifica.
Por odëi le regolamënt dl concurs de chësc ann drüca: Regolament_Concurs_2016_Blanch_y_Fosch_Fotoclub_Val_Badia.pdf
| Nater ann le tema prinzipal dl concurs é „GHEL“ . |
|
