Fotoclub Val Badia: "Chît", chësc ê le tema che le Fotoclub Val Badia á metü dant por le concurs de fotografia 2015. En vëndres ai 6 de novëmber él sté la premiaziun.
Concursc - Vigni ann danü mët da jí le Fotoclub Val Badia n concurs de fotografia, olache i apascioná é cherdá da se dé jö cun na tematica y la "cöie" te n retrat. Por le concurs 2015 él gnü cernü le tema "Chît", y al é sté indöt 21 fotografs che s'á dé jö impara, menan ite döt adöm 97 fotografies, che gnô spo valutades da na juria metüda adöm da Carlo Dapoz, Ivan Castlunger, Pire Ploner y Alfred Tavella.
La maiú pert di partezipanc ê dala Val Badia, mo tut pert á ince jënt de Puster y de Gherdëna. Rodunt ian Gherdëna él ince rové le pröm pest, che i é jü al fotograf Günther Linder de Sëlva, cun le retrat intitolé "Ütia desmentiada". Le tablé da munt injopé ite te na contrada de nëi i á trasmetü ala juria chël "chît" che an pó s'imaginé por la porsona che se ciafa dant n te' cheder natural. Le secundo post i é jü ala jona Noemi Call d'Al Plan, cun le retrat intitolé "Co ciafun pa le chît te na cité co n'é mai chita? (London)". Na porsona sentada sön na stiga amez cité, che pê avëi süa santa pêsc danter le fracac. Carlo Dapoz motivëia inscö la dezijiun dla juria: "An vëiga chësta porsona che ciara da na pert ia, sciöche sce ara se damanass ola jí a se chirí la pêsc". Le terzo post i é jü spo a Freddy Sottara da La Val, che á mené ite n retrat intitolé "Chit dla nöt" - na contrada bludra, ampla y da nëi, sot na löm demorvëia. Ince chiló n'á Dapoz degun dübe: "Sce t'es dassú a ciaré chësc panorama, poste ma plü sintí chît y pêsc".
La juria n'á nia albü n compit saurí da cerne i davagnadus, y Dapoz spliga ince la lîta che é tres sogetiva, canche al dij: "Sce t'as cin' juries, chiriará dötes fora val' d'ater", splighel, mo sön la secuënza premiada pro le concurs dl Fotoclub, é düc i mëmbri stá a öna sön la dezijiun.
Pablo Palfrader - La Usc di Ladins di 20.11.2015
Da man ciampa: Günther Linder, Reinhard Arnold, Helmut Elzenbaumer. Al mancia Noemi Call, Freddy Sottara, Walter Oberlechner y Edith Ellecosta
|
|
|
|
1° post Günther Linder
|
2° post Noemi Call
|
|
3° post Freddy Sottara
|
|
|
|
|
4° post Walter Oberlechner
|
5° post Edith Ellecosta
|
6° post Helmut Elzenbaumer
|
7° Reinhard Arnold |
|
|
8° post Helmut Elzenbaumer
|
10° post Noemi Call
|
La foto ruvada al 9° post é gnüda scualificada, ajache al ê ciamo lasura le inom dl fotograf.
Dessot pon ciafè la galeria dles 30 fotos plü beles dl concurs 2015. Les fotos dô le 10° post é gnüdes metüdes ite a cajo, nia dô la tlassifica.
Por odëi le regolamënt dl concurs de chësc ann drüca: Regolament_Concurs_Fotoclub_Val_Badia_2015.pdf
Nater ann le tema prinzipal dl concurs é „BLANCH Y FOSCH“ . |
|