Composiziun dla foto

Armonia è pö ma matematica

Al n'é chilò nia debojëgn de splighé plü avisa formules y teories di numeri. Al basta da dì che tl'eté medievala â le matematich Leonardo da
Pisa, conesciü sciöche Fibonacci, metü sö na secuënza de numeri (3, 5, 8, 13, 21, 34, 55 y i.i.) che evidenziëia n raport de partiziun de n cheder
che les porsones sënt sciöche le plü armonius. De chësta scoverta s'à bele anuzé i artisć dl Renascimënt por sües operes y da chilò él nasciü la regola dl „Goldener Schnitt" (foto nr. 1 y 2). 

Partide ite bun Osta fotografia 

Sce la fotografia vëgn partida ite sides orizontalmënter che verticalmënter te terc, ciafon fora avisa 4 punć che s'incunta y do chi ch'an po s'orientè. Pro i aparać plü nüs ciafon chësta partiziun en digital sot a forma de „Gitterlinien" sön le schermo y insciö se fejon plü saurì.

Por laurè cun chësc sistem mësson imparè da odëi le motif aladô de zertes linies, ći che n'é nia dagnora saurì. N pice „trucco" por abiné fora les dërtes linies é chël de stlü i edli tan dî ćina ch'an vëiga n retrat oramai turgher. Cun chël ch'an ne vëiga nia plü döt bel tler se evidenziëiel automaticamënter les ambries y les contures dl retrat. Insciö él inće plü saurì da s'imaginé les linies d'impostaziun dla fotografia.

Por ch'al garetes na bela fotografia, te chëra che nosc edl vëiga na bela partiziun armoniosa, messass i sogeć o i motifs plü importanć ester da ciafè sön un di 4 punć che s'incunta.

Na bela fotografia po inće gnì fata zënza tó en conscidraziun chësta regola, mo l'esperiënza insëgna che les plü beles fotografies y operes d'êrt é gnüdes cheriades se tignin ala regola dl „Goldener Schnitt".Chilò dessot vëgnel ćiamò reportè n valgügn ejëmpli che po daidé da capì co impostè la fotografia por che ara garetes bela, altamo por ći che reverda la composiziun dla fotografia. I atri aspeć gnarà analisà plü avisa tles leziuns suandëntes.

 

De stletes fotos n' é nia da salvè

Na ultima osservaziun por splighé ći che fej fora n bun fotograf. Les dites che fej aparać da fà jö dà plü gonot da capì che al dedaincö é vignun bun da fà jö, bele ma por les poscibilitês digitales che impormët de fà te n secundo momënt de vigni sort de coreziuns sön le retrat. Sce la löm ne stimenëia nia, spo n'él por ejëmpl degun problem, deache ara va pö da fà la fotografia plü lominosa sön computer.

Mo, dala dì en cört, él forsc plü bel y interessant da passè le tëmp amesa la natöra do l'aparat da fà jö co stlüć daìte dan le computer. Dessigü pòl ester che val' fotografies mësses gnì adatada sön le computer, mo pro n bun fotograf ne vara nia debojëgn de de gran coreziuns, deache döt stimenëia bele sciöch'al é. En general pòn dì dla fotografia: sc'ara é bela era bela, scenò ne jô vigni elaboraziun sön computer a nia.