Tres chësta leziun podëise Ves fà n'idea sön le monn di obietifs. Al vëgn splighé plü avisa la funziun dl grandangul, de obietifs tele y macro, de obietifs cun y zënza zoom.

Inće sce zacai podess dì val' d'ater é i obietifs l'elemënt plü important por le garatè de na fotografia. N bun obietif che impormët de mëte a füch sciöch'al alda é dër important por na bela fotografia de cualité (composiziun). N bun obietif conëscion fora dala resistënza y dala perfeziun dla mecanica (spielfrei?). Dessigü à i obietifs n cost, mo sc'an à vëia de fà de bi retrać spo pàiel dessigü la mëia da investì n pü' de val'.

De obietifs nen n'él n gröm de sorts, al depënn da ći ch'an ó fà jö. 

L'edl dla porsona vëiga sciöch' sc'an ćiarass fora por n obietif da 50mm, ô dì n obietif cun na destanza focala de 50mm. Dötes les fotografies che vëgn fates cun n te' obietif respidlëia ći che nos ćiarun y odun. Düć i obietifs che à na mëndra destanza focala é grandangui. Na destanza focala tlassica por n grandangul é por ejëmpl 24 mm. Chësta sort de obietifs va dër bun da fà jö contrades o fotografies de grup, dantadöt sce an ó abiné ite de gran toć de na contrada. I grandangui à indere n svantaje: mëndra che la destanza focala é, plü lerch che l'angolatöra dl cheder (Bildwinkel) vëgn, plü che les linies se tira (gekrümmt) (p.ej. pro n 10mm).


Retrat fat cun n grandangul

Chisc obietifs vëgn tuć da fà jö cosses ch'an ó trà daimprò. Les destanzes focales va dai 70 ćina ai 800 mm. Plü grana che la destanza focala é y plü che n obietif apësa y plü ch'al costa.

Cun n obietif tele ne vara nia ma da trà döt cotan plü daimprò, mo al vëgn inće lascè fora döt ći che é dessorora incër le motif ia. Deache l'angolatöra dl cheder (Bildwinkel) vëgn tres mëndra, vëgn la destanza focala tres majera. 

 

Düle fat jö cun n teleobietif. 

Tëra d'aragn cun gotes fata jö cun n obietif macro. 

Indicaziun: i obietifs cun na mëndra destanza focala à na majera profondité de ćiamp.

L'aumënt söl marćé di obietifs cun zoom desmostra che ai vëgn damanà tres de plü. N obietif cun zoom pîta la poscibilité de adorè de plü destanzes focales zënza messëi porchël baratè jö l'obietif. Impéde se tó do por ejëmpl de plü obietifs, da 24 mm, da 50 mm, da 180 mm y da 300 mm, se fejon plü saurì da tó n obietif cun zoom da 24 a 300 mm. Chësc é perfet! ... Sce y no. De positif él dessigü che sc'an à n obietif cun zoom spo n'àn nia plü bria da se tó do tröc obietifs y an sparagna pëis y scioldi. Mo inće sce i obietifs cun zoom é gnüs miorà cotan ti ultimi agn, rapresentëii impò n compromis por ći che reverda la cualité.

N ater punt negatif: sciöch'al é bele gnü splighé pro la leziun sura i valurs di diaframs, esistel inće pro i obietifs  zoom na regolaziun otimala, che corespogn ala destanza focala amesa ite. En pratica ôl dì che pro n zoom 70-300 mm abinon la miù metüda a füch sön i 180 mm.

 

N ultimo punt: pro tröc aparać digitai esistel n zoom che vëgn comanè da n software, che ne garantësc indere nia la cualité dla fotografia sciöche ara messass ester.

 
Angolatöra dla fotografia da fà jö na baraca di iagri (Hochsitz) tl bosch.

Indicaziun: ćiaréde d'avëi cura de Ösc obietifs, deache sc'al röia ite scich él valgamia rî da le tó demez. Pezes de microfaseri (Mikrofasentücher) va le miù da pozenè i obietifs. Da mëte man da pozenè él tres dal zënter cuntra l'estern, pozenan tres en cërtl da amez fora. Sc'al é de gragn fleć spo pòn eventualmënter incé bagné n pü' le bordun. Sce ara ne va propi nia da pozenè indortöra l'obietif, spo él damì da ti lascè fà chësc laûr ai spezialisć.

Canch'al é dër frëit defora él da mëte averda da jì te n iade daìte tl ćialt, deache al pò se cherié töme daìte tl aparat che ti fej mal al'eletronica. Te chisc caji pòn adorè de te pici sać aposta (Zip-Lock-Beutel) da mëte ite i obietifs.