En sabeda ai 13 de novëmber él gnü tignì tl Istitut Ladin a San Martin la premiaziun dl concurs da fà jö cun le tema „Dolomites, patrimone dl Unesco“ y inauguré la mostra dal medemo titul, olache al é gnü metü fora i plü bi retrać che é gnüs menà ite dal concurs.

Sciöche bele da 15 agn incà, à le Fotoclub Val Badia inće por le 2010 metü a jì n concurs da fà jö, ćiaran de chirì fora na tematica atuala y che dess inće motivé i fotografs da se porvè y da fà jö cosses particolares.

Insciö él por chësc ann gnü chirì fora le tema dles Dolomites, patrimone dl Unesco. Indöt él stè 14 fotografs che à tut pert al concurs cun 70 retrać. Na comisciun metüda sö aposta, de chëra che al fajô pert i fotografs y esperć Norbert Scantamburlo da Sanćiana, Sepp Hackhofer dl Ofize parcs naturai y Ivan Castlunger da San Martin, à chirì fora les diesc fotografies plü beles y significatives. Al é gnü tignì cunt dl’impostaziun dla fotografia, di corusc y dl’idea che i partezipanć à albü da interpretè le tema. „Daimprò ia él gnü metü sön na pert les fotografies manco beles, chëres che n’â nia la dërta löm o impostaziun y chëres che ne passenâ nia dër pro le tema“, à splighé Sepp Hackhofer en ocajiun dla premiaziun, por daidé capì co ch’al é gnü chirì fora i retrać che é spo gnüs premià. Döta la prozedöra da valuté y chirì fora i retrać à doré de plü ores y ala fin él gnü metü jö la tlassifica che vëiga bel dancà Vito Miribung da Urtijëi: ël à davagné le concurs 2010. Al secundo y al terzo post é rovà Walter Oberlechner da San Laurënz y Rudi Moling da San Martin. Rudi, fotograf y artist, à salpü da se desfarenzié dai atri dantadöt por l’idea originala: al à chirì fora sciöche soget na munt sot a na ćiampana de spidl, presentan insciö na interpretaziun personala dla nomina dles Dolomites sciöche patrimone dl’umanité. Danter i fotografs che à arjunt n post anter i pröms diesc él ćiamò Alfred Erardi da Arnpurch, Helmut Elzenbaumer da La Val y André Terza da Porsenù.

La mostra restarà daverta ćina ai 26 de novëmber dal lönesc ala jöbia, dales 10 ales 12 y dales 15 ales 17 y le vëndres dales 10 ales 12. Düć é dër bel invià da gnì a ti ćiarè.