La bela mostra cun 29 gran panì che reporta fotografies dal alt dla belëza dles Dolomites è da udëi tl zënter dl paîsc da San Ciascian.

L’ufize paesaje y natüra dla Provinzia da Balsan in colaboraziun cun la Fraziun da San Ciascian y le Comun de Badia.

La dezijiun dl Comitê dl patrimone mondial

Ai 26 de jügn dl 2009 azeta le Comitê dl patrimone mondial pro süa 33ejima sentada a Sevilla (Spagna) al’unanimité la domanda cun les condiziuns ghirades dala IUCN. Chilò dessot n estrat fora dla spligaziun sön le valur particolar y universal dles Dolomites:

„I nü raiuns parziai dl patrimone mondial dles Dolomites fej fora na seria de contrades da munt uniches de na belëza ezezionala. Sües pizes verticales y slaurides tan imposantes mostra sö a livel mondial na varieté de formes straordinara. Le numer y la conzentraziun de formaziuns da ćialc daldöt desvalies é valch de unich al monn. La geologia descurida te na manira tan grandiosa nes dà la poscibilité de odëi ite tla vita dl mer dl trias, che s’à svilupé do la maiù möria de sorts mai desmostrada tla storia dla tera. Les contrades maestoses, monumentales y riches de corusc dles Dolomites à dagnora bele afasciné n gran numer de viagiadus y é stades les fontanes de tröpes interpretaziuns scientifiches y artistiches.“

L’Organisaziun dles Naziuns Unides por l’educaziun, la sciënza, la cultura y la comunicaziun (UNESCO) sostëgn l’identificaziun, la sconanza y la conservaziun de bëgns culturai y naturai de döt le monn che vëgn aratà de valur ezezional por l’umanité. Chisc bëgns d’importanza universala vëgn scrić ite tla lista dl Patrimone mondial dl’UNESCO. Ćina śëgn él gnü reconesciü 890 bëgns te döt le monn, de chisc é 714 bëgns culturai o moscedà y ma 176 naturai.

Ai 26 de jügn dl 2009 é les Dolomites gnüdes scrites ite tla lista dl Patrimone mondial por mirit de süa contrada tan bela y unica y por l’importanza scientifica a livel geologich y geomorfologich. Ares é reconesciüdes danter “les plü beles contrades da munt al monn”.

L’iscriziun dles Dolomites tla lista dl Patrimone mondial é n reconescimënt straordinar, mo ara se damana inće n gran impëgn y responsabilité por la sconanza y le svilup sostenibl de chësc raiun dles Alpes.

Les imajes de chësta mostra lascia odëi contrades y grups de munts dl setur sudtirolesc dl Patrimone mondial.