Home - News - Ciases di parcs naturai: Tröpes scomenciadies por l’isté 2016
image11111Da en mertesc ai 3 de ma sarál indô davertes sis dles set Ciases di parcs naturai dla Provinzia. Tröpes scomenciadies é söl program.
La Ciasa vijites dl parch natural Fanes-Senes-Braies a Al Plan, la ciasa vijites dl parch natural Puez-Odles a Funes, la ciasa vijites dl parch natural Trëi pizes de Lorëi a Toblach y la ciasa dl parch natural Riesenferner-Ahrn a Türesc dauriará indô sües portes dai 3 de ma inant. De plü sará les scomenciadies, esposiziuns, conferënzes y vijites acompagnades tratan döt l'isté. Dessot na suraodüda dles scomenciadies plü importantes.
Les plü gran atraziuns dla Ciasa vijites dl parch natural Pues-Odles sará por chësc isté la mostra temporara „I trëi giganc: la laurs, le lustrel y le lu", la mostra fotografica „DolomitArt", la proieziun dl film „L'ambasciatore del buon gusto – il ritorno del bestiame alpino grigio", la proieziun multimediala open air de „Les Odles – un sogno vero", n program dediché ai funguns di bosć südtirolej cun na relaziun, mostra y escursciun, la scomenciadia dedicada ala familia „Ala scoverta dla natöra sön Börz" ai 21 d'agost, sciöche ince les edemes di agní dla Val de Funes. imag12555e

La Ciasa vijites dl parch natural Fanes-Senes-Braies á ince söl program de plü scomenciadies, danter l'ater les escursciuns „Sön les pedies dles laurs", che gnará metüdes da jí vigni jöbia dai 30 de jügn ai 22 de setëmber dales 08.30 ales 16.00 cun spazirades cina l'ander de Conturines olache al é gnü ciafé la laurs Ursus ladinicus. Ai 8 de messé gnarál organisé dales 18.00 tla Ciasa dl parch natural n referat dal titul „I anfibs dl Südtirol" cun le biologh Andreas Declara che sará ince ala pert tratan l'escursciun „Na vijita ai arosć" ai 23 d'agost dales 10.00 ales 17.00. Implü gnarál metü da jí na conferënza sön „Le monn di fongus" ai 24 d'agost dales 21.00 tl salf dles uniuns „Domëne Moling" a La Val. Ai 25 d'agost mët l'uniun di fongus „Bresadola" da jí adöm cun l'espert di fongus Claudio Rossi na escursciun „I fongus de nostes contrades" dales 14.00 ales 17.30.

La Ciasa vijites dl parch natural Trëi Pizes de Lorëi planifichëia por l'isté la mostra temporara „Les bisches dl Südtirol", l'esposiziun „I fonguns te nostes contrades", n'escursciun acompagnada tla val Fiscalina „Sön les ambries dla salamandra alpina", conferënzes en colaboraziun cun la farmazia de Toblach sön tematiches atuales. Al é ince preodü na conferënza sön i fongus por capí cai che an pó cöie y cai nia. La Ciasa vijites de Türesc organisëia ince la mostra temporara „Le variöl dles Alpes orientales".

imag125eL'entrada a dötes les Ciases vijites di parcs naturai provinziai é debann, sciöche ince pro dötes les manifestaziuns. Les Ciases di parcs naturai é davertes dal mertesc ala sabeda, dales 09.30 ales 12.30 y dales 14.30 ales 18.00, ti mëisc de messé y agost ince la domënia. La sajiun se stlüj ai 29 d'otober. Ai 7 de jügn dauriará ince la Ciasa di parcs naturai dl Sciliar-Ciadinac.