Home - News - Ok al program de intervënc ti set parcs naturai
994531__no-name_ La Junta provinziala á aprové le program de intervënc y proiec ti set parcs naturai. Indöt él a desposiziun 2,1 miliuns de euro.

I set parcs naturai dl Südtirol é öna dles atraziuns prinzipales por la popolaziun locala y por i sciori. Ai á debojëgn de na cura costanta y de intervënc de manutenziun por la rëi dles sëmenes, la segnaletica y ince les ciases di parcs naturai. Danter les ativités él ince preodü la realisaziun de stüdi y de planns, sciöche ince aspec che reverda l'informaziun y la sensibilisaziun sön tematiches dla sconanza dl paesaje y dla natöra ince tres scomenciadies speziales y escursciuns fora por la natöra.
La Junta provinziala á aprové incö ai 17 d'aurí i programs anuai di set parcs naturai por le 2018 sciöche preodü ince dai comites de gestiun. Tl dezëmber dl 2017 él gnü stabilí indöt da mët a desposiziun por intervënc y proiec por na soma de indöt 2,1 miliuns de euro. L'investimënt é partí sö danter le parch natural Sciliar-Ciadinac (285mile euro) parch natural Texelgruppe (437mile euro), parch natural Pöz-Odles (300mile euro), parch natural Fanes-Senes-Braies (336mile euro), parch natural Trudner Horn (154mile euro), parch natural Trëi Pizes de Lavarëi (258mile euro) y parch natural Riesenferner Ahrn (346mile euro).

I programs é gnüs deliberá dai comités de gestiun di parcs, te chi che al é rapresentá les aministraziuns locales, le setur dl'agricoltöra y dles forestes, sciöche ince les assoziaziuns ambientales. "I sun contënc de odëi che i parcs naturai vá inant cun proiec concrec y dá insciö so contribut por la conservaziun dl paesaje natural y ala sensibilisaziun dla popolaziun", sotlignëia l'assessur provinzial por l'ambiënt Richard Theiner. Danter les novités él ince la Ciasa dl Parch natural nöia de Suc che dess gní inaudada l'ann che vëgn. Por chësc proiet él gnü metü a desposiziun n import de 57mile euro dal Parch natural Sciliar-Ciadinac. Tla Ciasa dl Parch natural dles trëi Pizes de Lavarëi él preodü la recostruziun dl ofize y dla botëga por la venüda de gadgets. Tl proiet vëgnel investí 50mile euro.

Por intervënc che reverda les Dolomites patrimone mondial UNESCO él gnü stanzié indöt 153miel euro de chisc 125mile euro por la Fondaziun Dolomites UNESCO y 28mile por ativités de grup de laur y scomenciadies locales. Por mosöres de conservaziun di habitat Natura 2000 él preodü 350mile euro che provëgn dal'Uniun europeica. La Provinzia mët a desposiziun 260mile euro.