Trafich söi jus: Löm vërda dal govern por les normes d’atuaziun

Home - News - Trafich söi jus: Löm vërda dal govern por les normes d’atuaziun

Südtirol ará tl dagní la poscibilité da antergní diretamënter por limité le trafich di auti ince por sostigní la sconanza dl ambiënt y dl paesaje. La norma d'atuaziun che regolamentëia chësc argomënt é gnüda aprovada inier da sëra (ai 10 de forá) dal Consëi di Ministri en presënza dl presidënt Arno Kompatscher. Löm vërda ince ala norma sön la Curt di Cunc.

„Finalmënter él la Provinzia de Balsan che pó tó mosöres de limitaziun dl trafich sön les strades de süa competënza", á comenté le presidënt dla Provinzia Arno Kompatscher che á sotligné inant: „Al se trata de n contribut important nia ma por la sconanza dl ambiënt, mo ince por le mantignimënt de nosc patrimone naturalistich." Do le passaje dles normes d'atuaziun tla Comisciun di 12 á le Consëi di Ministri ince aprové inier da sëra (ai 10 de forá) le provedimënt che ne reverda nia ma la Provinzia de Balsan, mo ince chëra de Trënt. Le govern reconësc l'obietif da „garantí la sconanza, la conservaziun y la valorisaziun di raiuns da munt che á carateristiches speziales cun n valur alt por ci che reverda le paesaje y l'ambiënt", y ti conzed ales döes Provinzies autonomes da „atué mosöres adatades por la limitaziun dl trafich." Danter chëstes él ince la previjiun de limic de velozité aposta y na gran importanza ti vëgnel dé te chësc setur ai jus dolomitics.

La secunda norma d'atuaziun aproada dal Consëi di Ministri reverda indere la Curt di Cunc, y ti pormët ales döes Provinzies de Trënt y Balsan da istituí n „collegio" de revijiun di cunc sciöche organ de suravërda sön la regolarité contabla, finanziara y economica dla gestiun dles istituziuns publiches. Le collegium messará lauré adöm cun les seziuns competëntes dla Curt di Cunc de Balsan y Trënt. „Entrames les normes d'atuaziun ampliëia les capazités de gestiun autonoma de nosta provinzia y i oress rengrazié düc chi che se á dé da fá por arjigné ca chësc passaje important." Por le pröm iade é les normes d'atuaziun gnüdes aproades ince en presënza dl Minister nü por i afars regionai Enrico Costa, che s'á ince incunté inier cun le presidënt südtirolej Arno Kompatscher.